Turmush — Карачач Эралиева кумурска багып, алардын жашоосу тууралуу социалдык тармактагы баракчасы аркылуу айтып берип, көпчүлүктүн кызыгуусун жаратып жатат. Аны менен Turmush басылмасынын кабарчысы маектешти.
Каарманыбыз 2001-жылы Баткен облусуна караштуу Кызыл-Кыя шаарында төрөлгөн. Ысык-Көлгө келин болгон. Учурда жолдошунун жумушуна байланыштуу Бишкек шаарында жашап, декреттик өргүүдө. Ошол эле учурда Расул Акрам Ислам институтунун 1-курсунда билим алууда. Буга чейин Кыргыз-Түрк «Манас» университетинин мектепке чейинки билим берүү бөлүмүн аяктаган.
Карачач Эралиева кумурска багууну ушул жылы гана баштаганын айтат. Анын бул өзгөчө хоббисине 4 жаштагы уулунун кызыгуусу себеп болгон.
«Эки балам тең гиперактивдүү. Кабат үйдө жашагандыктан тынбай ызы-чуу кыла беришет. Балдар бир аз болсо да тынч отуруп, кумурскалардын жашоосун изилдешсин деп багып калдык. Кумурскалардын кыймылы, жашоо образы баланын мээсинин өрчүшүнө салым кошот экен. Башка жандыктардан айырмаланып, кумурска багуу жеңил», - дейт ал.
Ал кумурскаларды багууну интернеттен изденип өзү үйрөнгөн. Айтымында, алар ферманын ичинен чыкпайт. Сууну тамчылатып берип, тамактарын ошол жерге салып коёт. Кум шекер же бал кошулган сироп, алма, алмурут, нектарин сыяктуу жемиштерди беришет.
«Куурулган тамактан башкасын бере берсе болот. Тамактын калдыктарын тазалап туруу керек. Балдарым кечке айланчыктап эле карап отурушат», - деди ал.
Карачач Эралиева кумурска бакканын көрсөткөндө чоң талкуу жаралганын айтат.
«Көрүүчүлөрдүн көбү башында терс кабыл алып, шылдыңдашты. Бирок бара-бара кызыккандардын саны көбөйдү. "Башында сени акылдан азган экен дегем, азыр өзүм кызыгып баштадым" дегендер көп болуп жатат», - дейт каарманыбыз.
Көпчүлүк ага көчөдөгү кумурскаларды багууну сунушташат. Бирок анын айтымында, ал баккан кумурскалар атайын ферма жашоосуна ылайыкташкан түрү.
«Булардын эне кумурскасы жок көпкө жашап, көбөйө алышпайт. Эне кумурска көчөдө жүрбөйт. Жумушчу кумурскалар ага дайыма тамак-аш, суу ташып, коргоп турушат. Кумурскалар аябай акылдуу жандыктар. Таштандысы бөлөк, тамагы бөлөк, жада калса төрөткана жана мүрзөсү да өзүнчө болот. Абдан тартип жана тазалык менен жашашат. Милдеттерин бөлүштүрүп алышкан. Азыр элдер сурагандыктан фермасына кошо кумурсканы бул жактан алып, бакканга даяр комплект кылып берип жата», - дейт ал.
Каарманыбыз ат минүү, жаа атуу, фитнес менен машыгуу жана китеп окууну да жакшы көрөт.
«Балдар кичине болгондуктан көп нерсеге убакыт жетпейт. Бирок келечекте балдарымды жакшы тарбиялап, ошонун үзүрүн көрсөм дейм. Ат чабуу, жаа атуу боюнча мыкты үйрөнүп, башкаларга да үйрөткүм келет. Кыргыздын жакшы салттары унутулбай сакталышы керек. Ошондой эле динимди жайылтуу — чоң максаттарымдын бири», - деди ал.